जुम्ला-नेपालमा कोरोना भाइरसपछि अर्कै संकटका रुपमा आएको सलह कीरा जुम्ला पुगेको छ ।

छिमेकी जिल्ला रुकुम जाजरकोटमा र कालिकोट हुँदै जुम्ला पुगेको सलहले यहाँको पातारासी गाउँपालिकामा पुगेको हो । पातारासी गाउँपालिका १ र २ का अधिकांश बस्तीमा सलह कीराको झुण्डहरु प्रवेश गरेका छन् ।

जिल्लाको पूर्वमा पर्ने पातारासी क्षेत्र आलु मकै र गुहँ बालीका लागि पकेट क्षेत्र मान्निछ । यतिबेला उक्त क्षेत्रमा मकै आलु र गहुँ सबैका खेतबारीमा फलेका छन् । तर पातारासीमा प्रवेश गरेको सलह कीराले मकै, गहुँ र आलु बारीमा ठूलो क्षति पु-याएको पातारासी गाउँपालिका अध्यक्ष लछिमन बोहोराले बताए ।

उनका अनुसार, जताततै सलह कीराको बथान देखिन्छ । बालीनालीमा पनि धेरै क्षति पुगेको छ । परिपक्क हुनै लागेको मकै सखाप पार्न थालेपछि किसान चिन्तित छन् ।

सुरुमा छिटफुट रुपमा देखिएपनि अहिले ठूलो झुण्डमा सलह देखिन थालेका स्थानीय गोर्खबहादुर रावत बताउँछन् । आलु र मकै बारीमा प्रवेश गरेर ठूलो नोक्सान गरेको उनको भनाई छ । “सलह भगाउन विभिन्न बाजा बजाउने, मान्छे कराउने गर्छन्” उनले भने, “तैपनि सलह भागेको छैन ”।

पातारासीमा सलह कीराको झुण्डहरु प्रवेश गरीसकेकाले किसान सबै मिलेर नियन्त्रणमा जुट्नु पर्नेमा गाउँपालिकाले जोड दिएको छ । कृषि विकास शाखा संयोजक रुपक बुढा सलह भगाउने खास उपाय नभएको बताउँछन् ।

ठूलो मात्रामा सलह प्रवेश गरेकोले जुम्लाको स्याउ, मकै, उवा गहुँ लगायतका रैथाने बालीमा क्षति पुगेको छ । सलहले मकैबाली सखाप पार्न थालेपछि पातारासी क्षेत्रमा खाद्य संकट आउने सक्ने समेत चिन्ता व्यक्त गरेका छन् । अन्य बाली भन्दा मकै बालीमा सहल धेरै क्षेति गरेको छ । सलहले हरियो वनस्पतिलाई छोटो समयमा पात र डाँठसमेत खाएर नष्ट पारिदिन्छ ।