काठमाडौं – अमेरिकाले दक्षिण चीन सागरको विवादित क्षेत्रमा चीनले गरिरहेको दाबी गलत र गैह्रकानूनी भएको जनाएको छ ।

ताइवान, फिलिपिन्स, ब्रुनाइ, भियतनाम लगायतका मुलुकले सदियौदेखि उक्त क्षेत्रमा आफ्नो दावी गरिरहँदा चीनले कृत्रिम द्वीप खडा गर्दै बढाइरहेको सैन्य तैनाथी गलत भएको अमेरिकी विदेश मन्त्री माइक पोम्पियोले जनाएका छन् ।

क्षेत्रीय विवादमा कसैको पक्ष नलिने बताउँदै आएको अमेरिकाले आफ्ना सहयोगीहरूको अधिकार र समुद्री तटमा रहेका स्रोतहरूको संरक्षण गर्न भने अमेरिका प्रतिवद्ध रहेको पोम्पियोले बताएका छन्।

भियतनाम, मलेसिया र इन्डोनेसियाको नजिकको पानीमा चीनको दाबीलाई इन्कार गरेको स्मरण गराउँदै पोम्पयोले चीनका एकतर्फी गतिविधिले जलक्षेत्रको अधिकारमा अन्य मुलुकलाई बाधा पुर्‍याउनु गलत भएको बताए ।

विवादित क्षेत्र दक्षिण चीन सागरमा चीनको जल साम्राज्य बन्न संसारले अनुमति नदिनेसमेत उनले चेतावनी दिएका छन् ।