काठमाडौं – आज पनि मुलुकका अधिकांश स्थानमा वर्षा हुने भएको छ ।

प्रदेश ६ र ७ मा अहिले हल्का वर्षा भइरहेकोमा दिउँसोसम्म प्रदेश १, २ गण्डकी र कर्णाली प्रदेशका एक-दुई स्थानमा भने भारी वर्षाको समेत सम्भावना रहेको मौसम पूर्वानुमान महाशाखाले जनाएको छ।

पूर्वी क्षेत्रमा संक्रिय मनसुनी वायु र पश्चिमी भू-भागको पश्चिमी वायुको प्रभावले बिहान प्रदेश २, बागमती र ५ मा घाम लागे पनि मौसम बदली हुने महाशाखाको भनाइ छ ।

मौसम पूर्वानुमान महाशाखाले बिहान ६ बजे प्रकाशन गरेको मौसम पूर्वानुमान बुलेटिनअनुसार आज दिउँसो प्रदेश १, २, बागमती, गण्डकी र ५ का केही स्थान तथा बाँकी प्रदेशका थोरै स्थानमा मेघगर्जन,चट्याङसहित वर्षा हुने सम्भावना छ।

यस्तै राति प्रदेश २, गण्डकी, ५ नम्बर र कर्णाली प्रदेशका केही स्थान तथा बाँकी प्रदेशका थोरै स्थानमा मेघगर्जन,चट्याङसहित वर्षाको सम्भावना छ।