काठमाडौं- त्रिवि शिक्षण अस्पताल ( टिचिङ) मा भर्ना भएकी बालिकामा कोरोना संक्रमण पुष्टि भएपछि बालिकाको सम्पर्कमा आएका डाक्टर तथा नर्सहरुको खोजी कार्य सुरू भएको छ ।

इपिडिमियोलोजी तथा रोग नियन्त्रण महाशाखाका प्रमुख डाक्टर बासुदेव पाण्डेका अनुसार बालिकामा संक्रमण पुष्टि भएपछि उनीसँग सम्पर्कमा रहेका डाक्टर तथा नर्सको खोजी कार्य शुरू भएको हो ।

महाशाखाले बालिकाको सम्पर्कमा भएका डाक्टर तथा नर्सको पहिचान गर्न टोली बिहानैदेखि परिचालन गरिसकेको डा पाण्डेले बताए ।

उनले खबरहबसँग भने, ‘बिहान ९ बजे नै हाम्रो टोली कन्ट्रयाक ट्रेसिङका लागि टिचिङ गइसकेको थियो । त्यहा कन्ट्रयाक ट्रेसिङको काम भइसकेको छ । अब कपिलवस्तुमा उनको घर वरपरका स्थानीयमा कन्ट्रयाक ट्रेसिङको काम बाँकी छ ।

डा पाण्डेका अनुसार बालिकाको सम्पर्कमा रहेका डाक्टर र नर्सलाई सम्पर्कमा ल्याएर क्वारेन्टाइमा राख्ने तयारी भइरहेको छ । अस्पतालमा उपचारको क्रममा बालिकाको सम्पर्कमा आएका डाक्टर तथा नर्सलाई क्वारेन्टाइनमा राखेर कोरोना परीक्षण गरिने डा पाण्डेले जानकारी दिए ।