काठमाडौं- सरकारले बागमती प्रदेश प्रवेश गर्ने नाकामा कडाई गर्न थालेको छ । बुधबारदेखि प्रदेश–२ का विभिन्न जिल्लाबाट वाग्मती प्रदेशको राजधानी हेटौंडा छिर्ने नाकामा थप कडाइ गरिएको हो ।
प्रदेश–२ मा कोरोना संक्रमण फैलँन थालेपछि त्यहाँका विभिन्न जिल्लाबाट हेटौंडा छिर्ने नाकामा थप कडाइ गरिएको हो ।
मकवानपुरको कमाण्ड पोष्टले मंगलबार प्रदेश २ हुँदै वाग्मती प्रदेश प्रवेश गर्ने चुरियामाई नाका बुधबारदेखि बन्द गर्ने निर्णय गरेको थियो ।
सोही अनुसार प्रदेश २ का जिल्लाबाट चुरियामाई नाका हुँदै छिर्ने सबै सवारी साधन र मानिसहरुलाई प्रवेशमा कडाइ गरिएको हो ।
प्रवेश गर्न खोज्नेलाई बाटैमा रोकिएको छ । अधिकांशलाई फर्काइएको छ । ठूलो संख्यामा सुरक्षाकर्मी पनि परिचालन गरिएको छ ।
तर, अत्यावश्यक सवारी साधनलाई रातोमाटे चेकपोष्टमा सेनिटाइजिङ गरेर मात्र प्रवेश गर्न दिइएको छ ।
जिल्ला समन्वय समिति (जिसस) मकवानपुरका प्रमुख रघुनाथ खुलालका अनुसार हेटौंडासँग जोडिएको प्रदेश २ को नाका समेत रहेको सो क्षेत्रबाट कोरोना संक्रमितहरु आउने सम्भावना बढेपछि कडाइ गरिएको हो ।
हेटौंडाको चुरेक्षेत्रको वनजंगल हुँदै तराईका जिल्लाबाट मानिसहरु आउने गरेको पाइएकाले उनीहरुलाई रोक्न स्थानीय तहमार्फत नियन्त्रणको काम समेत थालिएको छ ।
हेटौंडामा खाद्यान्न तथा ग्यास पसल बिहान ९ बजेसम्म, औषधि तथा भेटेरिनरी एवं मलबीउ जस्ता कृषि पसललाई दिनभरि खोल्न पाइनेछ । १ जेठदेखि माछामासु तथा तरकारी बजार पूर्ण रुपमा बन्द गर्ने, बैंकलाई भीड नहुने गरी बिहान १० देखि ३ बजेसम्म खुल्ला गर्ने निर्णय पोष्टले गरेको थियो ।
अन्य जिल्लाबाट मकवानपुर प्रवेश गर्ने नाकामा पनि कडाइ गरिएको छ ।
प्रतिक्रिया