काठमाडौं- काठमाडौंको कागेश्वरी मनोहरा नगरपालिकामा रहेको सनसिटी अपार्टमेन्टमा बुधबार बिहानदेखि र्‍यापिड टेष्ट गरिने भएको छ ।

उक्त भवनमा करिब पाँच सय परिवारका १५ सय बढी नागरिक रहेका जनाइएको छ । स्वास्थ्य मन्त्रालयका प्रवक्ता विकास देवकोटाले उक्त क्षेत्रमा र्‍यापिड टेष्टका लागि स्वास्थ्य मन्त्रालयले काम थालिसकेको बताए पनि बुधबारबाट मात्र काम शुरु हुने भएको छ ।

स्वास्थ्य मन्त्रालयले खटाएको टोली मंगलबार बेलुकासम्म पनि सनसिटी क्षेत्रमा पुगेको छैन ।

कागेश्वरी मनोहराका मेयर कृष्णहरि थापाले स्वास्थ्यको टोलीले भोलि बिहान ९ बजेदेखि त्यहाँ काम शुरु गर्ने बताए ।

बेलायतबाट आएको एक परिवारमा गरिएको र्‍यापिड टेष्टमा कोरोना पोजेटिभ देखिएपछि उक्त भवन सोमबारदेखि नै सिल गरिएको छ ।

तीन जनाको परिवारमा कोरोना पोजेटिभ देखिए पनि पीसीआर विधिबाट दुईजनामा कोरोना पुष्टि भएको हो । त्यहाँ रहेका दुईजनामा कोरोना संक्रमण देखिएपछि अहिले उक्त भवनमा रहेकाहरुमा त्रास फैलिएको छ ।

उनीहरुले तत्कालै भवनभरि रहेका सबैको परीक्षण हुनुपर्ने माग गरेका छन् ।