ललितपुर- ललितपुरमा विदेशबाट आएका १०९ जनाको ‘र्‍यापिड डाइग्नोसिस टेस्ट’ रिपोर्ट नेगेटिभ आएको छ । ललितपुरमा महानगरद्वारा मंगलबार गरिएको कोरोना परीक्षणको ‘आरडीटी’ रिपोर्ट नेगेटिभ आएको हो ।

ललितपुर महानगरपालिका र स्वास्थ्य कार्यालय ललितपुरले नेपाल सरकारको सहयोगमा कोभिड-१९ र्‍यापिड डाइग्नोसिस टेस्ट कार्यक्रमलाई ललितपुरमा निरन्तरता दिएको छ ।

मंगलबार महानगरको २९ वडा मध्ये २१ वटा वडामा विदेशबाट आएकाको परीक्षण गरिएको हो। जसमा ५७ जना पुरुष र ५२ जना महिला छन् । बाँकी वडाको लागि बुधबार धापाखेल र बुङमतीमा परीक्षण गरिने कार्यक्रम राखिएको ललितपुर महानगरले जानकारी दिएको छ ।

ललितपुर महानगरपालिका प्रमुख चिरीबाबु महर्जनले सावधानी अपनाउन यो टेस्ट गरिएको बताए । कोरोनाका लागि कुनै औषधि नबनेको बताउँदै नगरबासीलाई घरमै सुरक्षित बस्न समेत उनले आग्रह गरे ।

ललितपुर महानगरपालिका जनस्वास्थ्य शाखा र्‍यापिड रेस्पोन्स टिमका फोकल पर्सन देवी थापा गुरुङले रगत झिकेर उक्त टेस्ट गरेको बताइन् । चीन , बेलायत , भारत म्यानमारबाट नेपाल आएकाहरुको कोरोना परीक्षण गरिएको उनले जानकारी दिनइन् ।

मंगलबार महानगरको वडा नं १, २, ३, ४, १३ , २०, ५, ६, ७, ८, ९,१०, ११, १२, १४, १५, १६, १८, १९ ,२८, २९ मा बस्ने विदेशबाट आएकाहरुको  र्‍यापिड डाइग्नोसिस टेस्ट गरिएको थियो ।

बुधबार धापाखेलस्थित २४ नं वडा कार्यालयको भवनमा २३, २४,२६ र २७ वडामा बसोबास गर्ने विदेशबाट आएकाहरुको  र्‍यापिड डाइग्नोसिस टेस्ट गर्ने कार्यक्रम रहेको महानगरले जनाएको छ ।