काठमाडौं – अमेरिकी राष्ट्रपति डोनाल्ड ट्रम्पले सबै राज्यमा लागु गरिएको लकडाउन फिर्ता लिनका लागि आफूसँग ‘पूर्ण’ अधिकार रहेको दाबी गरेका छन् ।

ह्वाइट हाउस कोरोना भाइरस टास्क फोर्सको सोमबारको ब्रिफिङ्गको क्रममा राष्ट्रपतिका रुपमा आफूसँग लकडाउन फिर्ता लिने पूर्ण अधिकार रहेको दाबी गरेका हुन् ।

उनको यो भनाईले राज्यका गभर्नर तथा संवैधानिक कानूनका ज्ञाताहरु आश्चर्य र दुविधाको अवस्थामा पुगेका छन् ।

‘अमेरिकाको राष्ट्रपतिसँग यसको पूर्ण अधिकार हुन्छ,’ पत्रकारसँग रिसाउँदै प्रस्तुत भएका ट्रम्पले भने, ‘राष्ट्रपतिका हिसाबले आफूलाई सबै राज्यका सम्बन्धमा निर्णय लिने अधिकार छ, यो कुरा गभर्नरहरु पनि जान्दछन् ।’

अमेरिकाको पूर्व र पश्चिम तटीय क्षेत्रका नौ राज्यले कोरोना भाइरसको संक्रमण फैलिन नदिनका लागि लागु गरिएको लकडाउन हटाउने तयारी समेत भएको उनले जनाएका छन् ।

अमेरिकाको संविधान अनुसार सार्वजनिक व्यवस्था र सुरक्षा कायम गर्ने अधिकार राज्यमा निहित छ । लकडाउन हटाउने अधिकार ट्रम्पसँग नरहेको कानूनविद्हरुले बताएका छन् ।