ओटावा– क्यानाडाका नागरिकलाई अत्यावश्यक बाहेक अन्य भ्रमण स्थगित गर्न प्रधानमन्त्री जस्टिन ट्रुडोले आग्रह गरेका छन् ।

कोरोना भाइरसको सङ्क्रमण थप फैलिन सक्ने भएकाले विशेष गरेर अन्तर्राष्ट्रिय यात्रा रोक्न उनले आह्वान गरेका हुन् । साथै उनले आफू पनि क्वारेन्टाइनमा बसिरहेको अन्तर्राष्ट्रिय सञ्चारमाध्यमले जनाएका छन् ।

यसअघि उनकी श्रीमती सोफियालाई कोराना भाइरसको सङ्क्रमण भएको सार्वजनिक भएको थियो ।

विश्वभर कोरोना भाइरसको प्रकोप चुलिरहेका बेला क्यानाडेली प्रधानमन्त्रीले यस्तो आह्वान गरेका हुन् । हालसम्म कोरोना भाइरसका कारण ५५४४ जनाको ज्यान गइसकेको छ भने अरु १ लाख ४८ हजार जना यसबाट संक्रमित छन् ।

यसअघि अमेरिकी राष्ट्रपति डोनाल्ड ट्रम्पले कोरोना भाइरसको प्रकोपलाई मध्यनजर गर्दै अमेरिकामा राष्ट्रिय संकटकालको घोषणा गरेका थिए ।