काठमाडौं– आज प्रणय दिवस अर्थात भ्यालेन्टाइन डे । नेपालमा भ्यालेन्टाइन डे मनाउने चलन पछिल्लो पुस्ता अर्थात तन्नेरी पुस्तामा विकास भइरहेको छ ।

पश्चिमा संस्कृति भएपनि नेपाली युवा युवतीले भ्यालेन्टाइन डे मनाउने गरेका छन् । प्रमी प्रेमिकाले एक अर्कालाई गुलाफका फूल दिएर वा उपहार दिएर माया व्यक्त गर्ने गर्छन् भने मन पराएका व्यक्तिलाई प्रपोज गर्ने दिनको रुपमा पनि यस दिनलाई लिने गरिएको छ ।

यसैबीच नेकपाका उपाध्यक्ष वामदेव गौतमले भ्यालेन्टाइन डे मनाएका छन् ।

१४ फेब्रुवरी अर्थात आज मनाइने भ्यालेन्टाइन डेमा उपाध्यक्ष गौतमले पत्नी तुलसा थापालाई गुलाफको फूल दिएका छन् ।

गौतमले पत्नीलाई गुलाफको फूल दिएको तस्वीर उनीहरुका छोरा हरिशले सामाजिक सञ्जालमा राखेका छन् । ‘रोमान्टिक बाबा आमाको अगाडि हामी त फिक्का’ हरिशले सामाजिक सञ्जालमा तस्वीर राख्दै लेखेका छन् ।

उपाध्यक्ष गौतमले घुँडा मारेर एक हातले पत्नी तुलसालाई गुलाफको फूल दिएका छन् भने अर्को हातले पत्नीको हात समाएका छन् ।

त्यस्तै सामाजिक सञ्जालमा प्रधानमन्त्री केपी शर्मा ओलीले पत्नी राधिका शाक्यलाई गुलाफको फूल दिएको तस्वीर पनि भाइरल बनेको छ ।