काठमाडौं- माघे संक्रान्तिको अवसरमा चार प्रदेशले सार्वजनिक बिदा दिएका छन् ।

प्रदेश १, २, ५ र कर्णाली प्रदेशले माघे संक्रान्ति तथा माघीको अवसरमा सार्वजनिक बिदा दिने निर्णय गरेका हुन् ।

प्रदेश-१ मा मंगलबार बसेको मन्त्रिपरिषद बैठकले माघे संक्रान्तिको अवसरमा बुधबार बिदा दिने निर्णय गरेको छ ।

त्यस्तै प्रदेश २ सरकारले पनि बुधबार सार्वजनिक बिदा दिने निर्णय गरेको छ ।

प्रदेश ५ सरकारले थारु समूदायको माघी पर्वको अवसरमा दुई दिन सार्वजनिक बिदा दिने निर्णय गरेको छ ।

थारु र मगर समुदायको बाहुल्य रहेको प्रदेश ५ मा माघ १ र २ गते सार्वजनिक विदा दिने निर्णय गरेको सरकारका प्रवक्ता तथा भौतिक पूर्वाधार तथा विकास मन्त्री वैजनाथ चौधरीले जानकारी दिए ।

गत वर्ष पनि प्रदेश ५ सरकारले दुई नै बिदा दिएको थियो। यस्तै कर्णाली प्रदेश सरकारले थारु जातिको मुख्य पर्व माघीमा सार्वजनिक बिदा दिने भएको छ।