काठमाडौं– प्रधानमन्त्री केपी शर्मा ओलीले भारतले नक्कली अयोध्या खडा गरेर सांस्कृतिक तथ्यमाथि अतिक्रमण गरेको बताएका छन् ।

भानु जयन्तीका अवसरमा प्रधानमन्त्री निवास बालुवाटारमा भएको कार्यक्रममा बोल्दै उनले भगवान रामको राज्य अयोध्या नेपालको वीरगञ्ज पश्चिममा पर्ने भए पनि भारतले विवादित अयोध्या खडा गरेको बताए ।

उनले भने, ‘हामी अलिकति सांस्कृतिक हिसाबले थिचिएका छौँ । तथ्यहरूमा अतिक्रमण भएको छ । हामी अहिले पनि ठानिरहेका छौँ हामीले ‘सीता’ भारतका राजकुमार रामलाई दियौँ । भारतका होइन अयोध्याकालाई दिएका हौँ हामीले ।’

उनले अयोध्या भनेको वीरगञ्जभन्दा अलि पश्चिमपट्टीको गाउँ भएको बताए ।  अहिले खडा गरिएको अयोध्या नक्कली भएको बताए ।

उनले भने, ‘अयोध्या वीरगञ्जको पश्चिमपट्टी ठोरीमा, वाल्मिकी आश्रम यही (नेपालमा), र दशरथबाट सन्तान नभएपछि पुत्रीष्टी यज्ञ लगाउने पण्डित जी रिडीका । त्यसकारण सन्तान (राम) पनि भारतीय होइनन् ठाउँ (अयोध्या) पनि भारतीयको होइन् ।’

प्रधानमन्त्री ओलीले ज्ञान, विज्ञान र अनेक कुराको सुरुवात र विकास नेपालमा भएको भए पनि त्यो शृंखलाले निरन्तरता पाउन नसकेको बताए।

२०७औ भानुजयन्ती विशेष समारोहमा उनले सफल काब्यको माध्यमबाट राष्ट्रिय एकता भाषिक र भावनात्मक एकता कायम गर्न सफल भएको विचार व्यक्त गरे ।

प्रधानमन्त्री ओलीले नेपाली भाषा साहित्यको सम्बर्द्धन प्रवर्द्धन र निरन्तर विकासका लागि प्रतिवद्धता समेत व्यक्त गरे ।