काठमाडौं- प्रधानमन्त्री केपी शर्मा ओलीले नयाँ नक्सा संसदबाट पारित भएसँगै अब चाँडै भारतसँग वार्ता हुने बताएका छन् ।

उनले कालापानी, लिपुलेक र लिम्पियाधुरालाई नेपालको नक्सामा राखेपछि निशान छापमा यो नक्सालाई समावेशका लागि संविधानको अनुसूची ३ संशोधन गर्न ल्याइएको संविधान संशोधन विधेयक प्रतिनिधिसभाबाट सर्वसम्मतिले पारित  भएसँगै एउटा ‘कोर्स’ पूरा गरेको बताएका छन् ।

संघीय संसदको प्रतिनिधिसभा बैठकबाट संविधान संशोधन विकेयक पास भएपछि बाहिरिने क्रममा प्रधानमन्त्री ओलीले भारतसँग वार्ता अगाडि बढाइने बताएका हुन् ।

“नयाँ नक्सा संसदबाट पारित भएसँगै हामीले एउटा कोर्स पूरा गरेका छौं, अब भारतसँग वार्ता हुन्छ”, प्रधानमन्त्री ओलीले भने, “केही साथीहरु अनुपस्थित हुनु बेग्लै कुरा हो, विपक्षमा कोही छैनन् ।”

सिंगो देश एकजुट भएको बताउँदै उनले संविधान संशोधनमा अभूतपूर्व एकता देखिनु नेपाल र नेपालीका लागि खुसीको कुरो भएको बताएका छन् ।

प्रतिनिधिसभामा आज भएको मतदानमा संविधान संशोधन विधेयकको पक्षमा २ सय ५८ सांसदले मतदान गरेका थिए । विपक्षमा कुनै पनि सांसदले मतदान गरेनन् भने मतदान गर्दिनँ भन्नेमा पनि कुनै मत परेको थिएन ।

संसदमा उपस्थित सबै जनाले मतदान गरेसँगै विधेयक दुई तिहाई भन्दा बढी मतले पारित भएको सभामुख अग्नि सापकोटाले घोषणा गरेका थिए ।