काठमाडौं- नेपालको नयाँ नक्सा निशान छापमा समावेश गर्न नेपालको संविधान (दोस्रो संशोधन) विधेयक २०७७ पारित गरिसयोस् भन्ने प्रस्ताव माथि प्रतिनिधिसभामा मतदान शुरु भएको छ ।

मतदानका शुरुहुनुपूर्व ५ मिनेटको विभाजन घण्टी बजाइएको छ। यो समयमा संसद बैठकमा नभएका तर बाहिर रहेका सांसदहरू बैठकमा जानेछन् । घण्टी बजेर सकिएपछि संसद बैठकका सबै ढोका बन्द गरिएका छन् । तत्पश्चात मतदान शुरु गरिएको छ ।

प्रतिनिधिसभाको शनिबारको बैठकमा दफावार छलफल सकिएपछि कानुन, न्याय तथा संसदीय मामिलामन्त्री शिवमाया तुम्बाहाङ्फेले उक्त विधेयक पारित गरियोस् भन्ने प्रस्ताव पेस गरेकी हुन् ।

उक्त विधेयकमाथिको दफावार छलफल सकिएको छ । छलफलका क्रममा सबै राजनीतिक दलले समर्थन जनाएका छन् । उक्त विधेयकमाथि मतविभाजनको प्रक्रिया अगाडि बढेको छ ।

लिखित रूपमा मतविभाजन भएपछि सभामुखले उक्त मतविभाजनको परिणाम सुनाउनेछन् ।