काठमाडौं- विश्वव्यापी महाामारीको रुपमा फैलिएको कोरोना भाइरसबाट संक्रमित १५ लाखभन्दा बढी मानिस निको भएर फर्किएका छन्।

अमेरिकाको जोन होप्किन्स विश्वविद्यालयले अद्यावधिक गरेको तथ्यांकअनुसार १५ लाख २ हजार ६ सय २० जना कोरोनाको उपचार सफल भएपछि अस्पतालबाट डिस्चार्ज भएका हुन्।

बुधबार दिउँसो समाचार तयार पार्दासम्म विश्वभरमा कोरोना संक्रमितको संख्या भने ४२ लाख ७८ हजार १ सय ८० छ।

सबैभन्दा बढी अमेरिकामा संक्रमित देखिएका छन्। अमेरिकामा मात्र १३ लाख ७० हजार १६ जना कोरोना संक्रमित भएका छन्। अमेरिकामा कोरोना भाइरसकै कारण ८२ जहार ३ सयभन्दा मानिसको मृत्यु भएको छ।

विश्वमा २ लाख ९२ हजार ३ सय १६ जनाको मृत्यु कोरोना भाइरस संक्रमणका कारण भएको छ। अमेरिकापछि बढी मृत्यु हुने देशमा बेलायत दोस्रो स्थानमा छ।

भारतमा भने ७४ हजार ९ सय ९५ जना संक्रमित भएका छन्। नेपालमा हालसम्म २१९ जना संक्रमित भएका छन् भने ३५ जना उपचारपछि निको भएर घर फर्किएका छन्।