काठमाडौं– कैलालीको लम्कीमा एक ६५ वर्षीया महिलामा कोरोना संक्रमण देखिएपछि नेपालमा कोरोना संक्रमितको संख्या १३ पुगेको छ । सेती प्रादेशिक अस्पताल धनगढीका अनुसार कैलालीको लम्की चुहा नगरपालिका घर भएकी महिलामा कोरोना संक्रमण देखिएको हो ।

लम्कीचुहा नगरपालिका कार्यालय स्रोतका अनुसार उनी चैतको दोस्रो साता मात्रै पर्साको वीरगन्जबाट परिवारका सदस्यसहित लम्कीस्थित आफ्नो घर फर्किएकी थिइन् । नगरपालिकाले उनलाई १४ दिन क्वारेन्टाइनमा पनि राखेको थियो ।

क्वारेन्टाइनमा रहेका बीरामीको थ्रोट स्वाब गरी परीक्षण गर्ने क्रममा ती महिलामा कोरोना पोजेटिभ देखिएको थियो । कोरोना पोजेटिभ देखिएसँगै उनलाई पनि धनगढीस्थित सेती प्रादेशिक अस्पताल पुर्याएर आइसोलेसन वार्डमा भर्ना गरिएको छ ।

सेती प्रादेशिक अस्पतालमा यसअघि नै ४ जना कोरोना संक्रमित छन् । ६५ वर्षीया महिलासँगै सेती प्रादेशिक अस्पतालमा भर्ना भएका कोरोना स‌ंक्रमितको संख्या ५ पुगेको छ भने अर्का एक जनालाई पनि कोरोना संक्रमणको आशंकामा आइसोलेसनमा भर्ना गरिएको छ ।

योसँगै नेपालमा हालसम्म कोरोना भाइरसको संक्रमण देखिएका व्यक्तिको संख्या १३ पुगेको छ ।  अन्य संक्रमितहरुमध्ये २ जनाको काठमाडौं टेकुस्थित शुक्रराज ट्रपिकल तथा सरुवा रोग अस्पतालमा, २ जनाको संक्रमित बाग्लुङस्थित धौलागिरी अस्पताल र ३ जना संक्रमितको पर्साको वीरगन्जस्थित नारायणी अस्पतालको आइसोलेसन वार्डमा उपचार भइरहेको छ ।