काठमाडौं– दोस्रो पटक मिर्गौला प्रत्यारोपण गरी अस्पतालबाट डिस्चार्ज भएका प्रधानमन्त्री केपी शर्मा ओली निजी निवासमा हुँदा पनि चिकित्सककै निगरानी रहने भएका छन् ।

फागुन १९ गते अस्पताल भर्ना भइ २१ गते मिर्गौला प्रत्यारोपण गराएका प्रधानमन्त्री ओली १० दिन पछि (शुक्रबार) अस्पतालबाट डिस्चार्ज भएका हुन् ।

त्रिवि शिक्षण अस्पतालको मिर्गौला रोग तथा प्रत्यारोपण चिकित्सा विभागकी प्रमुख तथा प्रधानमन्त्री ओलीकी निजी चिकित्सक डा दिव्य सिंह शाहका अनुसार डिस्चार्ज भएपछि पनि ओलीले आफ्नो स्वास्थ्य अवस्थाबारे नियमित ‘फलो–अप’ गराइरहने छन् ।

प्रधानमन्त्री ओलीले निजी निवासबाटै आफ्नो दैनिक कार्य सञ्चालन गर्न सक्ने डा सिंहले जनाएकी छन् । यद्यपि उनी सामान्य व्यक्ति झै पूर्ण रुपमा सक्रिय हुन भने अझै पनि ६ महिनादेखि १ वर्षसम्म लाग्नसक्ने डा सिंहको भनाइ छ ।