बुटवल– रुपन्देहीस्थित मालपोत र नापी कार्यालयका कर्मचारीहरु १७ लाख घुससहित पक्राउ परेका छन् ।

अख्तियार दुरुपयोग अनुसन्धान आयोगको बुटवलस्थित कार्यालयबाट खटिएको टोलीले मालपोत कार्यालयका ३ र नापी कार्यालयका १ जना कर्मचारीलाई १७ लाख रुपैयाँ घुससहित पक्राउ गरेको हो । पक्राउ पर्नेमा एकजना लेखापठी व्यवसायी समेत छन् ।

अख्तियार दुरुपयोग अनुसन्धान आयोगको बुटवल कार्यालयका प्रमुख भीष्मकुमार भूषालले मालपोत र नापी कार्यालयका कर्मचारीहरु १७ लाख घुससहित पक्राउ परेको पुष्टि गरे ।

उनीहरुलाई बिचौलियामार्फत घुस लिएको अवस्थामा पक्राउ गरिएको भुषालले खबरहबलाई जानकारी दिए ।

‘मालपोत र नापी कार्यालयका कर्मचारीहरु घुससहित पक्राउ परेका छन्,’ अख्तियारको बुटवलस्थित कार्यालयका प्रमुख भूषालले खबरहबसँग भने, ‘हामी अहिले फिल्डमै छौं । घटनाको अनुसन्धान भइरहेको छ । उनीहरुले कुन प्रयोजनका लागि घुस लिएका हुन् भन्ने कुरा अनुसन्धान पछि मात्रै खुल्छ ।’

अख्तियारको बुटवल कार्यालय स्रोतका अनुसार घुससहित पक्राउ पर्नेमा नापी कार्यालय रुपन्देहीका नापी अधिकृत सरोज श्रेष्ठसहितका कर्मचारी छन् ।

उनीहरुले जग्गाको कित्ताकाटमा सहजीकरण गरिदिने भन्दै घुस लिएका बुझिएको छ ।