विराटनगर–कोरोना भाइरस (कोभिड १९) संक्रमणको आशंकामा कोशी अञ्चल अस्पतालमा उपचाररत दुई जनालाई धरानस्थित वीपी कोइराला स्वास्थ्य विज्ञान प्रतिष्ठानमा रिफर गरिएको छ ।

केही दिन अघि वेदेशबाट आएका उनीहरुमा रुघाखोकी र ज्वरोको लक्ष्यण देखिएपछि अस्पताल भर्ना गरिएको थियो ।

कोशी अञ्चल अस्पतालमा कोरोना भाइरसको आशंकामा उपचाररत दुबै जनालाई थप उपचारको लागि धरानस्थित वीपी कोइराला स्वास्थ्य विज्ञान प्रतिष्ठानको आइसोलेसन रेफर गरिएको कोशी अस्पतालकी मेडिकल सुपरिटेन्डेन्ट डा. संगिता मिश्रले जानकारी दिइन् ।

कोरोना आशंका गरिएका बिरामी उपचार गर्न कोसी अस्पतालमा तयार गरिएको वार्डको जिम्मेवारी सम्हालिरहेका डा. लक्ष्मीनारायण यादवले दुई जनालाई थप उपचार र परीक्षणको लागि धरान पठाइएको बताए ।

‘विदेशबाट आउनुभएको रहेछ । ज्वरो, रुघाखोकीको पनि लक्ष्यण देखिएको थियो । शंका लागेर आइसोलेसन वार्डमा रेफर गरेका हौं । तर कोरोना नै हो भन्ने पुष्टि भएको छैन ।’ उनले भने ।

रेफर गरिनु सामान्य भएको भन्दै सर्वसाधारणले आतंकित हुनुपर्ने अवस्था नरहेको उनले बताए ।