काठमाडौं– पेभेलियन मिडिया प्रा.लिद्वारा सञ्चालित खबरहब डटकमको स्थापनाकालदेखि प्रधानसम्पादकको भूमिका निर्वाह गरेका वरिष्ठ पत्रकार जीवराम भण्डारीलाई औपचारिक बिदाइ गरिएको छ ।

दरबारमार्गस्थित पेभेलियन हलमा आयोजित कार्यक्रममा खबरहब डटकमका अध्यक्ष नरेश श्रेष्ठ, नवनियुक्त प्रधानसम्पादक वरिष्ठ पत्रकार गोविन्द लुइँटेलसहितको टिमले भण्डारीको बिदाई गरेको हो ।

तीन दशकदेखि पत्रकारितामा आबद्ध भण्डारीको सम्पादकीय नेतृत्वमा खबरहबले सफलता हासिल गरेको भन्दै अध्यक्ष श्रेष्ठले भण्डारीको नेतृत्वमा लोकप्रिय, विश्वसनीय र व्यावसायिक पत्रकारिताको अभ्यास भएको भन्दै धन्यबाद व्यक्त गरे।

भण्डारीले योहो टेलिभिजनको समाचार प्रमुखको रुपमा जिम्मेवारी लिएको भन्दै एक वर्षभन्दा लामो कार्यकाल एउटा कुशल टीमसँग काम गर्ने अवसर पाएको भन्दै सबैप्रति आभार व्यक्त गरे । भण्डारीले नवनियुक्त प्रधानसम्पादक लुइँटेलको नेतृत्वमा खबरहबले अझै उचाई लिने विश्वास व्यक्त गरे ।