बेइजिङ– चीनले हङकङ र मकाउ मामिलाका लागि चिनियाँ कार्यालयका निर्देशक फेरबदल गरेको छ । हङकङमा ७ महिना लामो चीन सरकारविरोधी हिंसात्मक प्रदर्शन शान्त भएजस्तो देखिएको केही समयलगत्तै चीन सरकारले हङकङ र मकाउ मामिला कार्यालयका निर्देशक झाङ शियाओमिङलाई हटाएको हो ।

उनको स्थानमा चीनको जन राजनीतिक परामर्शदाता सम्मेलनका उपाध्यक्ष शिया बाओलोङलाई नियुक्त गरिएको चीनको समाचार संस्था सिन्ह्वाले जनाएको छ ।

हङकङ र मकाउ मामिला कार्यालयको निर्देशकबाट हटाइए पनि झाङले कार्यालयको उपनिर्देशकको रुपमा दैनिक प्रशासनिक गतिविधिलाई निरन्तरता दिने सिन्ह्वाले जनाएको छ ।

यसअघि जनवरी महिनामा चीनले हङकङको सम्पर्क कार्यालयका प्रमुखलाई पनि बर्खास्त गरेको थियो । शिया चिनियाँ राष्ट्रपति सी चिनफिङका निकटस्थ मानिन्छन् ।

उनले हङकङमा पनि चीन सरकारको अधिक नियन्त्रण हुनुपर्ने विचारधारा राख्ने गरेको बताइन्छ । चीन सरकारको पछिल्लो निर्णय हङकङलाई चीनको अधिक नियन्त्रणमा राख्नका लागि लिइएको अन्तर्राष्ट्रिय सञ्चारमाध्यमको विश्लेषण छ ।