काठमाडौं– नेकपा क्रान्तिकारी माओवादीका महासचिव मोहन वैद्य ‘किरण’ले क्रान्तिको प्रक्रिया जारी रहेको बताएका छन् ।

नेपाली नयाँ जनवादी क्रान्तिले धक्का खाए पनि क्रान्तिको सम्पूर्ण प्रक्रिया भने समाप्त नभएको बैद्यको भनाइ छ ।

२५ औं जनयुद्ध दिवसको अवसरमा बिहीबार एक वक्तव्य जारी गर्दै वैद्यले तत्कालीन नेकपा माओवादीको मूल नेतृत्वको गद्दारीका कारण जनयुद्ध र क्रान्तिको प्रक्रियाले गम्भीर घक्का खान पुगेको पनि बताएको छ ।

‘१० वर्ष जनयुद्ध, झापा विद्रोह र विभिन्न जनआन्दोलनमा जनताले बगाएको रगतको आहालमा टेकेर सत्तामा पुगेका नेताहरुले आज घरेलु प्रतिक्रियावादी सत्ताको नेतृत्व गर्दै साम्राज्यवाद र विस्तारवादको दलाली गरिरहेका छन्,’ वैद्यले आफ्नो वक्तव्यमा भनेका छन् ।