टाउको दुख्नु अधिकांश मानिसको समस्या हो । कामको चाप, तनाव, जीवनशैली, खानपान, मौसम र सहनशक्तिको अभावले टाउको दुख्छ ।

हेर्दा सामान्य देखिए पनि टाउको दुखाईलाई वेवास्ता गर्नुहुदैन । यदि लगातार टाउको दुखेमा चिकित्सकको परामर्श लिनुपर्छ । तर यदि धेरै टाउको दुख्यो र तत्काल चिकित्सक कहाँ जान अनुकुल नभए घरेलु उपायबाट यसलाई नियन्त्रण गर्न सकिन्छ ।

१. मनतातो पानी र कागती
यदि लगातार टाउको दुखिरहेको छ भने एक गिलास मनतातो पानीमा आधा कागतीको रस मिसाएर पिएमा टाउको दुखाई निको हुन सक्छ । कागती पानीले पेटमा ग्याँस बनेर बसेको विकारलाई निकाल्ने गर्दछ । ग्याँसको समस्याले पनि टाउकोको दुख्ने गर्दछ ।

२. नुन, दूध र ल्वाङ
टाउको दुखाईबाट आराम पाउन नुन, दूध र ल्वाङको प्रयोग उपयोगी मानिन्छ । आधा चमच ल्वाङको धुलो र एक चिम्टी नुनलाई मनतातो दुधमा मिसाएर पिउँदा टाउको दुखाईबाट आराम मिल्दछ ।

३. लसुनको रस
लसुनको रस पिउँदा लगातार टाउको दुख्ने समस्याबाट राहत पाउन सकिन्छ । रस पिउँदा न्युनतम एक चम्चा पिउनु पर्दछ । लसुनका केही टुक्रालाई निचोरेर यसको रस निकाल्नु पर्दछ । लसुन एक प्रकारको प्राकृतीक पेनकिलर पनि हो ।

४. पुदिना
माइग्रेनको समस्यामा पुदिनाको सेवन निकै महत्वपूर्ण मानिन्छ । प्राचिन समयदेखि टाउको दुखाईको समस्यामा पुदिना खाने गरिन्थ्यो । यदि लगातार टाउको दुखेको छ भने पुदिनालाई चियामा हालेर पिउँदा आराम मिल्दछ ।

५. जीरा र अदुवाको रस
जीराको धुलोमा अदुवा र धनियाँको रस हालेर बनाएको चिया पिउनाले लगातार दुखेको टाउको दुखाई निको हुने गर्दछ । यो घोल बनाउन एक गिलास मनतातो पानीमा जिराको धुलो हाल्ने । त्यसपछि अदुवा र धनियाँ पातको रस हाल्ने र केहिबेर उमाल्ने ।