बुटवल– प्रदेश ५ को पाल्पामा भाद्र कृष्ण नवमीका दिन रणउजीरेश्वरी भगवती जात्रा मनाइँदैछ । मुख्यमन्त्री शंकर पोखरेलले सामाजिक दूरी कायम गरेर जात्रा र पर्व मनाउन आह्वान गरेका छन् ।

विसं. १८७१–७२ को नेपाल–अंग्रेज युद्धका क्रममा नेपाली सेनाका अमर योद्धा उजिरसिंह थापाको नेतृत्वमा जीतगढीमा विजय हासिल भएको थियो । जीतगढीको लडाइँ मोर्चामा आफ्नो पराक्रम साहस र रणकौशलका साथ पाल्पा हुँदै अन्ततः नेपाल कब्जा गर्ने अंग्रेजको योजना उनैले विफल बनाइदिएका थिए ।

कर्णेल उजिरसिंहकै अदम्य साहस र सफलताको खुशीयालीमा विसं १८७७ देखि पाल्पामा हरेक वर्ष भाद्र कृष्ण नवमीका दिन भगवती रथयात्राको आयोजना गरिँदै आएको छ ।

जात्राको दिन आज पाल्पामा सार्वजनिक विदा दिइएको छ । सार्वजनिक विदा यसै वर्ष सुरु भएको हो ।

प्रदेश ५ का मुख्यमन्त्री शंकर पोखरेलले एक सन्देश दिँदै विजयउत्सवको रूपमा मनाइने पाल्पाको रणउजीरेश्वरी भगवती जात्राका अवसरमा सबै नेपाली र पाल्पाली जनसमुदामा बधाई तथा शुभकामना व्यक्त गरेका छन् । उनले अंग्रेज फौजलाई परास्त गरी विजय हासिल गर्ने कर्णेल उजिरसिंह सहित सबै योद्धाप्रति उच्च सम्मान प्रति प्रकट गरेका छन् ।

मुख्यमन्त्री पोखरेलले भनेका छन्, ‘दुई शताब्दीदेखि निरन्तर चलिरहेको जात्राले नयाँ पुस्ताका लागि पुर्खाको वीरता–धीरता गाथाको स्मरण गराउँछ । यस जात्राले हामीलाई राष्ट्रिय स्वाधीनता र राष्ट्रिय हितको बाटोमा हिँड्न प्रेरित गरेको छ ।’

उनले पुर्खाको देशभक्तिको गौरवपूर्ण लडाइँ सम्झिदै हामी त्यही सत्मार्गमा हिँडेर मुलुकको सार्वभौमसत्ताको रक्षा गर्दै अविचलितरूपमा अघि बढौँ भन्ने आह्वान पनि गरेका छन् । ।

मुख्यमन्त्री पोखरेल सामाजिक दूरी कायम गरेर जात्रा र पर्व मनाउन, आफू जोगिन र अरूलाई पनि जोगाउन आह्वान गरेका छन् । उनले भनेका छन्, ‘कोरोना विरुद्धको अभियानलाई सार्थक बनाऔँ । भगवती जात्रा मनाउँदा यस वर्ष विगतमा भन्दा फरक ढंगले सामाजिक दुरी कायम गरी मनाउन म हार्दिक अपील गर्दछु ।’