काठमाडौं- साझा पार्टी र विवेकशील नेपाली दलले पुन: एकताका लागि वार्ता समिति बनाएका छन् ।

साझाले आइतबार बसेको केन्द्रीय समितिको अनलाइन बैठकले विचार मिल्ने पार्टी तथा समूहसँग एकीकरणका लागि भन्दै वार्ता समिति बनाएको हो । वार्ता टोलीमा समीक्षा बाँस्कोटा, केशव दाहाल, किरणकृष्ण श्रेष्ठ सदस्य छन् ।

बैठकका निर्णयबारे साझाका सहप्रवक्ता शरदराज पाठकले भने, ‘पार्टीले समान सोच भएका पार्टी, समूह र व्यक्तिहरुसँग एकीकरणको प्रक्रियाका लागि वार्ता समिति गठन गरेका छौं ।’

विवेकशीलले यसअघि नै ३ सदस्यीय वार्ता टोली बनाएको थियो । समितिमा रमेश पौडेल, निर्देश सिलवाल र रन्जु दर्शना छन् ।

पार्टी एकताका लागि आफूहरुले राखेको प्रस्ताव अस्वीकृत भएपछि साझाका केन्द्रीय सदस्यद्वय सूर्यराज आचार्य र मुमाराम खनालले पार्टी परित्याग गरेका छन् ।

उनीहरुले विचार मिल्नेसँग एकता गर्न पार्टीमा संयोजकमात्रै राखेर अन्य संरचना भत्काउनु पर्ने प्रस्ताव राखेका थिए ।

आइतबारको केन्द्रीय समिति बैठकले उक्त प्रस्ताव अस्वीकृत गरेपछि आचार्य र खनालले पार्टी नै छाडेका हुन् । तर सहप्रवक्ता पाठकले आचार्यले पार्टी नत्यागेको र खनालले राजीनामा दिएको दाबी गरे ।