काठमाडौं- भूमि व्यवस्था, सहकारी तथा गरिबी निवारण मन्त्री पद्माकुमारी अर्यालले सहकारी विभागको अनुगमन तथा निरीक्षण गरेकी छिन् ।

उनले शुक्रबार विभागको निरीक्षण गर्दै कोरोना भाइरसको सम्भावित जोखिमलाई मध्यनजर गर्दै दुई सिफ्टमा कार्यालय सञ्चालन गर्न निर्देशन दिएकी हुन् ।

उनले लकडाउनलाई व्यवस्थित गर्ने सन्दर्भमा सरकारले लागू गरेका नियमहरुको पूर्ण पालना गर्न समेत कर्मचारीहरुलाई निर्देशन दिइन् ।

मन्त्री अर्यालले भनिन्, ‘कार्यालयमा भीडभाड कम गर्न दुई सिफ्टको सिस्टम लागू गरेर कार्यालय सञ्चालन गर्नुस् ।’

कोरोनाले नयाँ चुनौती थपेको भन्दै उनले अहिले विदेशबाट फर्किएकाहरुलाई सहकारीमार्फत रोजगारी दिन सकिने बताइन्।

‘अहिले परिस्थिति फेरिएको छ । कोरोना महामारीका कारण विदेशमा रहेका धेरै नेपालीहरु स्वदेश फर्किएका छन् । केही फर्किने क्रममा छन्, उनीहरुलाई समेत स्वरोरजगार बनाउनुपर्ने छ’, मन्त्री अर्यालले  भनिन्, ‘हामीसँग रहेका सहकारीमार्फत उनीहरुलाई रोजगारी दिन सक्ने अवस्था छ ।’

अहिले नै सहकारीहरुको राम्रोसँग नियमन गर्न नसकेमा भविष्यमा ठूलो चुनौती हुनसक्ने उनको भनाइ थियो ।