एजेन्सी- दक्षिण कोरियाले नोभेल कोरोना भाइरसका नयाँ संक्रमित ‘सिङ्‌गल डिजिट’ मा आउन्जेलसम्म कडा भौतिक दूरीको उपाय अवलम्बन गर्न नागरिकलाई चेतावनी दिएको छ ।

दक्षिण कोरियाको स्वास्थय मन्त्री पार्क नेयुङ होले कोरोना संक्रमणको दोस्रो लहर फैलिन नदिन कडा भौतिक दूरी कायम गर्न निर्देशन दिएका हुन् । उनले सिओल महानगरबासीलाई जतिसक्दो घरबाहिर ननिस्किन आग्रह गरेका छन् । बिहीबारमात्रै दक्षिण कोरियामा ५६ जना नयाँ संक्रमित फेला परेका थिए ।

उनले रात्रिकालिन मनोरञ्‍जनका स्थानहरु, धार्मिक स्थलहरु, म्युजियम र पार्कहरु बन्द गर्नसमेत निर्देशन दिएका छन् । यसअघि निश्‍चित दूरी कायम गर्दै यस्ता स्थानहरु खुला गरिएका थिए । विगत दुई सातादेखि लगातार ५० भन्दा बढी दैनिक संक्रमित फेला परेपछि कडा भौतिक दूरीको नियम अवलम्बन गराउन लागिएको हो ।

दक्षिण कोरियामा हालसम्म कोरोना संक्रमितको संख्या १२ हजार ३ पुगेको छ भने २७७ जनाको मृत्यु भएको छ । हालसम्म १० हजार ६६९ जनाको उपचारपछि घर पठाएको दक्षिण कोरियाको स्वास्थ्य मन्त्रालयले जनाएको छ ।