काठमाडौं- सर्वोच्च शिखर सगरमाथाबारे चिनियाँ मिडियाले भ्रम छरेको भन्दै बाराका युवाहरुले चीनविरुद्ध प्रदर्शन गरेका छन् ।

बाराका स्थानीय युवाहरु मंगलबार राष्ट्रिय झण्डासहित प्रदर्शनमा उत्रिएका हुन । उनीहरुले चीन विरोधी नारा लगाउँदै चिनियाँ राष्ट्रपतिको पुत्दा समेत दहन गरे । ‘गो ब्याक चाइना’ लेखिएका प्ले कार्डसहित उनीहरु चीनविरूद्ध प्रदर्शन गरेका हुन् ।

२ मे मा चीनको राष्ट्रिय टेलिभिजन चाइना ग्लोबल टेलिभिजन नेटवर्कले आधिकारिक ट्वीटरमा चोमोलोङमाको चुचुरोमाथि देखिएको विशेष किसिमको सूर्यको दृश्य भनी तस्बिर राखेको थियो । जसमा विश्वको सर्वोच्च शिखर माउन्ट एभरेष्ट चीनमा पर्छ भनिएको थियो ।

सो विषयलाई लिएर उनीहरुले विरोध जनाएका हुन् । यही विषयमा नेपालीहरुले सामाजिक सञ्चालमा चीनको विरोध जनाइरहेका छन् । गलत सूचना सम्प्रेषण गरेको भन्दै सामाजिक सञ्जालमा विरोध भएको हो । उनीहरुले ऐतिहासिक तथ्य हेर्न र सच्याउन सुझाव दिएका छन् ।