काठमाडौं – कोरोना भाइरसको संक्रमण कम हुँदै गएपछि जनजीवन केही सहज बनाइएको दक्षिण कोरियामा फेरि संक्रमितको संख्या बढ्न थालेको छ ।

संक्रमित घट्दै गएपछि रात्रिकालीन सेवाहरू सञ्चालन गर्न केही खुकुलो बनाइएकोमा तिनै क्षेत्रबाट नयाँ संक्रमित बढेका छन् ।

पछिल्लो दुई दिनमा कोरियामा २ जनाको मृत्यु भएको छ भने ६२ जना नयाँ संक्रमित थपिएका छन् ।

अधिकांश संक्रमित दक्षिण कोरियाको राजधानी सियोलका छन् । रात्रिकालीन सेवा दिने विभिन्न होटल, रेष्टुरा तथा क्लबका आगन्तुकले गलत सम्पर्क नम्बर र ठेगाना टिपाउँदा सम्भावित संक्रमितको खोजीमा समेत अप्ठ्यारो भएको भएको छ ।

संक्रमितको संख्या बढेपछि यसैसाता देखि विद्यालय सञ्चालन गर्ने तयारी गरेको कोरियाले तत्कालै विद्यालय सञ्चालन नगर्ने निर्णयमा पुगेको अन्तर्राष्ट्रिय सञ्चार माध्यमहरुले जनाएका छन् ।

दक्षिण कोरियामा १० हजार ९३६ जना कोरोना भाइरसबाट संक्रमित भएकोमा ९ हजार ६७० जना निको भएका छन् । १ हजार ८ जनाको उपचार भइरहेको छ भने २५८ जनाको मृत्यु भएको छ ।