काठमाडौं – सामाजिक अभियन्ता तथा हास्यकलाकार सीताराम कट्टेलले भारतले मिचेको नेपाली भूमि फिर्ता गर्न भारत सरकारले छिटो कदम चाल्न अनुरोध गरेका छन् ।

भारतले लिपुलेकमा सीमाना मिचेर तिब्बतको मानसरोवर जाने सडक निर्माण गरेपछि नेपालमा भारतविरुद्ध आवाज गुञ्जिएको छ । कट्टेलले सामाजिक सञ्जालमार्फत भारतको यो कदमको विरोध गरेका हुन् ।

विभिन्न समयमा नेपालको सीमा मिचिरहने र विवादमा आइरहने भारतले आफ्नो स्वभावलाई पछिल्लो कदमअन्तर्गत लिपुलेक हुँदै चीनको तिब्बतस्थित मानसरोवर जाने सडक निर्माणले प्रष्ट पारेको छ,’ धुर्मुस लेख्छन्, ‘कालापानी, लिपुलेकर सुस्तामात्र होइन, नेपाल–भारत सीमाका ७१ स्थामा भारतीय पक्षले सधै विवाद निकाल्दै आएको छ, त्यसैले स–सम्मान नेपाली भूमि फिर्ता गर्न भारतले यथासक्य छिटो कदम चालोस् भनी आग्रह गर्छौं ।’

उनले अन्तर्राष्ट्रिय कानूनअनुसार विवाद सुल्झाउन पनि पहल गरेका छन् । उनले लेखेका छन् – हामीलाई सीमा मिचेर ठूलो भूभाग भएको छिमेकी होइन, ठूलो हृदय भएको छिमेकी चाहिएको हो ।

भारतले लिपलेकमा नेपाली भूमि मिचेर मानसरोवर जाने सडक उद्घाटन गरेपछि नेपालमा भारतको व्यापक विरोध भएको छ । भारतले भने आफ्नै भूमिमा बाटो बनाएको दाबी गरेको छ ।