काठमाडौं- बेलायतमा कोरोना भाइरसको संक्रमणबाट मृत्यु हुनेको संख्या १० हजार नाघेको छ ।

आइतबारको पछिल्लो तथ्यांक अनुसार गएको २४ घन्टाभित्र थप ७ सय ३७ जनाको कोरोना संक्रमणका कारण निधन भएपछि बेलायतमा कोरोनाबाट ज्यान गुमाउनेको संख्या १० हजार ६ सय १२ पुगेको हो ।

हाल बेलायतमा ८४ हजार २ सय ७९ जना यस रोगबाट संक्रमित छन् भने ५ हजार २ सय ८८ जना थप नया संक्रमित भएका छन् ।

विगत केहि दिन यता कोरोनाका कारण दैनिक मृत्युदर बढ्दै गर्दा बेलायतको अवस्था युरोपको भन्दा पनि भयाबह हुन सक्ने विज्ञहरुले बताएका छन् ।

हाल जारी गरिएका मृतकहरुको तथ्यांकमा अस्पतालको मात्र समावेस गरिएको र अन्य प्राइभेट रेसिडेन्ट र केयरहोमका मृतकहरुको समावेस नभएकोले मृतक संख्या निकै बढी हुनसक्ने बताइएको छ ।

विश्वभरिमा कोरोना संक्रमणका कारण १ लाख दश हजार भन्दा बढीले ज्यान गुमाइसकेका छन् भने १८ लाख भन्दा बढी प्रभावित भैसकेका छन् । जसमध्य ४ लाख १२ हजार भन्दा बढिको उपचार भैसकेको छ ।

चीनको वुहानबाट शुरु भएको कोरोनाको संक्रमण हाल अमेरिकामा सबैभन्दा बढी फैलिएको छ ।