काठमाडौं – नायिका केकी अधिकारीको यो वर्ष सफल रह्यो । उनले अभिनय गरेको फिल्म ‘छ माया छपक्कै’ सुपरहिट भयो । उनले फिल्ममा गरेको अभिनयको पनि तारिफ भयो ।

फिल्म पाएर पनि चर्चा नपाउने केकीले यो वर्ष धेरै चर्चा पाइन् । ‘कोहलपुर एक्सप्रेस’ चोरी गरेर बनाएको भन्दै केकीलाई नै गाली गर्ने दर्शकले पनि उनको तारिफ गरे ।

निर्माताका रुपमा पनि केकी यो वर्ष सफल रहिन् । उनको समेत लगानी रहेको रियालिटी शो ‘कमेडी च्याम्पियन’ ले पनि चर्चा दिलायो ।

त्यसो त केकीले अभिनय गरेको ‘रातो गलबन्दी’ फिल्मको चर्चा भएन । यो फिल्म हलमा रिलिज भएको समेत दर्शकले पत्तो पाएनन् । यद्यपि यो वर्ष केकीले असफलताभन्दा सफलता पाएकी छिन् ।

महिला हिंसाका बारेमा आवाज उठाउने नायिका भनेर चिनिएकी केकीले यो वर्ष एक बैंकको विज्ञापन र ‘घाँटीभन्दा तल’ बोलको गीत सामाजिक सञ्जालमा शेयर गरेपछि विवादमा तानिइन् ।

र, पनि वर्ष २०७६ केकीका लागि उपलब्धीपूर्ण रह्यो । उनले मोडलिङ गरेका म्युजिक भिडियोको पनि चर्चा भयो । यस वर्ष केकी व्यक्तिगत जीवनका कारणभन्दा बढी फिल्मी करिअरका कारण चर्चामा रहिन् ।