काठमाडौं – नेपाल कम्युनिष्ट पार्टी (नेकपा) का बरिष्ठ नेता झलनाथ खनालले कोरोना भाइरस संक्रमण रोकथामका लागि उच्चस्तरीय संयन्त्रको औचित्य नरहेको बताएका छन् ।

कार्यकारी अध्यक्ष पुष्पकमल दाहाल प्रचण्डले कोरोना भाइरसको संक्रमण फैलन नदिन सरकारी काममै सघाउ पुर्‍याउन उच्चस्तरीय राजनीतिक संयन्त्र आवश्यक रहेको बताइरहँदा प्रधानमन्त्री ओलीले त्यसको औचित्य नरहेको बताएलगत्तै बरिष्ठ नेता झलनाथ खनालले पनि त्यस्तो संयन्त्र आवश्यक नरहेको बताएका छन् ।

शनिबार राति सगरमाथा टेलिभिजनलाई दिएको एउटा अन्तरबार्तामा खनालले यस्तो बताएका हुन् । कोरोना भाइरसको जोखिम न्यूनिकरणका लागि सरकारले अहिले राम्रै ढंगले काम गरिरहेकाले त्यसमा बरु सबैले सघाउन जरुरी रहेको उनले बताए ।

‘हामी सबै एकताबद्ध भएर लाग्नुपर्ने भएको छ,’ खनालले भने,’ धेरै खाले संयन्त्रहरु बनाएर पनि काम छैन, कामकाजी संयन्त्रहरु बाहेक अरु संयन्त्रको काम छैन तर अहिलेको अवस्था भनेको साझा सत्रुकाबिरुद्ध लडिरहेको अवस्था हो त्यसकारणले बृहत्तर राष्ट्रिय एकता कायम गर्न सरकारले ध्यान दिनुपर्छ ।’

कोरोना भाइरसको उपचारमा आवश्यक पर्ने स्वास्थ्य सामग्री पर्याप्त नभएकाले त्यस्ता सामग्री खरिद सन्दर्भमा सरकार होसियार हुनुपर्ने उनले सुझाव पनि दिएका छन् ।

‘कुनै पनि कमसल सामग्री ल्याउने, सामानहरु ल्याउँदा कमिसनको खेलहरु हुने जस्ता कुराहरुमा सतर्क हुन जरुरी छ,’ खनालले भने, ‘नेकपा कुनै पनि किसिमका अनियमितता भयो भने त्यो कुरा सहन गर्दैन, यो कुरा सरकारमा बस्ने प्रधानमन्त्री लगायत सबैले बुझ्नुपर्ने हुन्छ।’