काठमाडौं– कोरोनाको संक्रमण नेपालमा भित्रिएका त्यसलाई नियन्त्रणमा लिन नसकिने भन्दै पूर्व सावधानी अपनाउन माग भएको छ ।

विहीवार बसेको प्रतिनिधिसभा बैठकमा नेपाली कांग्रेसका सांसद भीमसेनदास प्रधानले सरकार कोरोनाबारे गम्भीर नभएको आरोप लगाए ।

अमेरिका युरोप लगायतले यात्रा लगायतमा प्रतिवन्ध लगाइसकेको र धेरै मानिसहरु भीडभाड हुने काम रोकिसकेको भएपनि नेपाल सरकारले त्यसलाई वेवास्ता गरेको उनले आरोप लगाए ।

उनले संसद पनि रोक्नु पर्ने बताए ।

‘सरकारले अहिले पनि निरन्तर चलाइरहेको छ । जहाँ भीडभाड हुन्छ त्यहाँ संक्रमण हुने खतरा हुन्छ । स्कूलहरु बन्द गर्नुपर्‍यो’ उनले भने,‘फैलिहाल्यो भने हामीसँग केही पूर्वाधार छैन यसलाई रोक्न, अमेरिका युरोपले त उडानहरु रोकेका छन् हामीले चलाइरहेका छौं ।’

कोरोनाको संक्रमण फैलियो भने नेपालले नियन्त्रणमा लिन नसक्ने र धेरै मानिसहरुको ज्यान जाने हुँदा पूर्व सावधानी अपनाउनु पर्ने उनको भनाइ छ ।