अंकारा– सिरियामा बसर अल असद सत्ताविरुद्ध युद्धरत विद्रोही समूहले सिरियाली सेनाविरुद्ध गरेको कारवाहीमा ५१ सिरियाली सैनिक मारिएको टर्कीले दाबी गरेको छ ।

युद्धक्षेत्रमा रहेको श्रोतलाई उद्धृत गर्दै टर्कीको रक्षामन्त्रालयले जारी गरेको विज्ञप्तिमा उत्तर पश्चिमी सिरियामा विद्रोहीको आक्रमणबाट ५१ सिरियाली सैनिक मारिएको दाबी गरिएको छ ।

त्यस्तै, विज्ञप्तिमा विद्रोही फौजले सिरियाली सेनाको हतियार भण्डार र दुई वटा ट्यांक समेत नष्ट पारेको दाबी गरिएको छ ।

टर्किस सेनाको बमबारीको सहयोगमा सिरियाली विद्रोहीले सेनाविरुद्ध इडलिब प्रान्तको नयरब शहरमा हमला गरेको अन्तर्राष्ट्रिय सञ्चारमाध्यमले जनाएका छन् ।

त्यसअघि सिरियाली सेनाले राजधानी दमास्कसलाई मुलुकको दोश्रो ठूलो शहर अलेप्पोसँग जोड्ने राजमार्गलाई सन् २०१२ यता विद्रोही फौजबाट पूर्ण रुपमा नियन्त्रणमा लिइएको सिरियाली सञ्चारमाध्यमले दाबी गरेको थियो ।

सिरियाली सेनाले उक्त राजमार्ग पूर्ण रुपमा नियन्त्रणमा लिएपछि टर्किस सेनाको बमबारीको मद्दतमा सिरियाली विद्रोहीले नयरब शहरमा आक्रमण गरेका थिए । त्यस्तै, विद्रोहीले सिरियाली सेनाको हेलिकोप्टर खसालेको समेत दाबी गरेका थिए ।

गत डिसेम्बर महिनामा सिरियाली सेनाले इडलिब–अलेप्पो क्षेत्रमा थालेको कारवाहीयता हजारौं वर्गकिलोमिटर भूभाग नियन्त्रणमा लिइसकेको छ ।