मुम्बई – बलिउड अभिनेता आमिर खानका छोरा जुनैद खान अब छिट्टै बलिउडमा डेब्यु गर्न लागेका छन् ।

भारतीय मिडियाहरूमा प्रकाशित समाचार अनुसार जुनैद यशराज फिल्मसको ब्यानरमा बन्ने फिल्मबाट बलिउड डेब्यु गर्दैछन् ।

फिल्ममा ‘अर्जुन रेड्डी’ फेम कलाकार शालिनी पाण्डेको पनि भूमिका रहने जनाइएको छ ।

आजतकले सूत्रको हवाला दिँदै जुनैद र शालिनीलाइ फिल्ममा साइन गरिएको बताएको छ । यशराज फिल्मसले शालिनीलाई एकसाथ तीन फिल्ममा अनुबन्ध गरेको छ ।

खबरका अनुसार यो फिल्मको छायांकन सन् २०२१ मा थालिनेछ । फिल्मलाई सिद्धार्थ मल्होत्राले निर्देशन गर्नेछन् । यसअघि मल्होत्राले रानी मुखर्जीको फिल्म ‘हिच्की’ निर्देशन गरेका थिए ।

यद्यपि यशराज फिल्मसले जुनैद र शालिनीलाई फिल्ममा अनुबन्ध गरेको सम्बन्धमा आधिकारिक जानकारी भने दिएको छैन ।