काठमाडौं– रामेछाप र सोलुखुम्बुको सीमानामा निर्माणाधीन लिखु हाइड्रोपावरमा कार्यरत ४७ कोरोना संक्रमित मजदुरलाई गुपचुप रुपमै बर्दिया पुर्‍याइएको खुलासा भएको छ ।

सोलुखुम्बुको लिखु पिके गाउँपालिकाको किन्जास्थित लिखु हाइड्रोपावर कम्पनीको क्वारेन्टाइनमा रहेका ४७ जना बर्दियाका कामदारलाई कम्पनिमै रहेको समयमा कोरोना संक्रमण पुष्टि भएसँगै टिपर र गाडीमा राखेर बर्दिया पुर्‍याइएको खुलेको हो ।

बर्दियास्थित मधुवन नगरपालिकाका मेयर गणेशबहादुर क्षेत्रीले हाइड्रोपावर कम्पनीले मापदण्ड नै पूरा नगरी गैरकानूनी रुपमा संक्रमितहरुलाई सोलुखुम्बुबाट गत २० गते बर्दिया पुर्‍याएको बताए ।

मेयर क्षेत्रीले भने, ‘अहिले नेपालको कानून र संघीय सरकारको निर्देशन अनुसार जहाँ संक्रमण देखियो संक्रमितहरुलाई त्यहीं नै आइशोलेशनको व्यवस्था गर्नुपर्छ । उच्च सुरक्षा सावधानी अपनाएर एम्बुलेन्सबाट मात्र अन्यत्र लैजान सकिने व्यवस्था छ ।  तर कम्पनीले कुनै नियम नै पूरा नगरी अटेर गरेर सोलुखुम्बुको प्रशासन र हाइड्रोपावरले गैरजिम्मेवार तरिकाले यात्रा गरायो । घटनामा संलग्नन जो–जो छन् उनीहरुलाई स्वास्थ्य ऐन अनुसार कारबाही गर्नुपर्छ ।’

अध्यक्ष क्षेत्रीका अनुसार बर्दिया पनि उनिहरु सबैको कोरोना पोजेटिभ नै आएको छ । मधुवन नगरपालिकाले आइतबार विहान सर्वदलीय बैठक बोलाएर सोलुखुम्बु प्रशासनको विरोध गरेको छ।

सोलुखुम्बुको लिखु पिके गाउँपालिकाका अध्यक्ष डम्बरबहादुर बस्नेतले हाइड्रोपावर कम्पनिले कोरोना संक्रमितहरुलाई लगिसकेपछि मात्र थाहा पाएको बताए । अहिले त्यस स्थानमा एमभी दुगड समूहले तीन वटा हाइड्रोपावर आयोजनाहरु निर्माण गरिरहेको छ ।