सुनसरी- सुनसरीको झुम्का कारागारका एक कैदीको कोरोना भाइरसको संक्रमणले मृत्यु भएको छ ।

एक वर्षदेखि झुम्का कारागारमा रहेका सुनसरी रामधुनी नगरपालिका– ५ झुम्का ठेगाना भएका ४४ वर्षीय पुरुषको कोरोना भाइरसको संक्रमणले मृत्यु भएको हो ।

उनको शुक्रबार अपराह्न साढे ४ बजे बीपी कोइराला स्वास्थ्य विज्ञान प्रतिष्ठान धरानमा उपचारका क्रममा मृत्यु भएको प्रतिष्ठानका प्रवक्ता डा.निदेश सापकोटाले जानकारी दिए ।

दश दिनयता ज्वरो आएका उनलाई दुई दिनदेखि श्वासप्रश्वासमा पनि समस्या देखिएको थियो । त्यसलगत्तै उनलाई जिल्ला अस्पताल इनरूवा लगिएको थियो । अस्पतालले रेफर गरेपछि शुक्रबार करिब १२ बजे उनलाई प्रतिष्ठानमा भर्ना गरिएको थियो ।

प्रतिष्ठानको ल्याबमा परीक्षण गर्दा उनमा कोरोना पोजेटिभ देखिएपछि प्रतिष्ठानको आकस्मिक कक्षमा भर्ना गरेर उपचार गरेकोमा उपचारकै क्रममा मृत्यु भएको प्रवक्ता डा.सापकोटाले जानकारी दिए ।