काठमाडौं – उच्च अदालत पाटनले लगानी बोर्डको प्रमुख कार्यकारी अधिकृतमा सुशील भट्टलाई नियुक्त गर्ने निर्णय कार्यान्वयन नगर्न अल्पकालीन अन्तरिम आदेश दिएको छ ।

अधिवक्ता जयबहादुर भुजेलले दायर गरेको रिटमाथि सुनुवाइ गर्दै मंगलबार मुख्य न्यायाधीश नहकुल सुवेदीको एकल इजलासले भट्टलाई बोर्डको प्रमुख कार्यकारी अधिकृतमा नियुक्त गर्ने निर्णय कार्यान्वयन नगर्न आदेश जारी गरेको हो ।

भट्टलाई साउन ३२ गतेसम्मका लागि मन्त्रिपरिषदको निर्णय कार्यान्वयन नगर्न आदेश दिइएको छ । साथै साउन ३२ गते पक्ष र विपक्ष दुवैलाई छलफलमा अदालतमा बोलाइएको छ ।

अधिवक्ता भुजेलले भट्टको नियुक्तिविरुद्ध प्रधानमन्त्री तथा मन्त्रिपरिषदको कार्यालय, बोर्डको कार्यकारी अधिकृत सिफारिस समिति लगायतलाई विपक्षी बनाउँदै रिट दायर गरेका थिए ।

मन्त्रिपरिषदले साउन १९ मा लगानी बोर्डमा भट्टलाई सीईओ नियुक्त गरेको जनाएको थियो । यो निर्णयसँगै एजेन्टलाई सीईओमा नियुक्त गरिएको भन्दै उक्त निर्णयको विरोध भएको थियो ।