काठमाडौं – त्रिभुवन विश्वविद्यालयका उपकुलपति प्राध्यापक डा. धर्मकान्त बास्कोटाको कार्यकक्ष नेपाल विद्यार्थी संघका विद्यार्थीहरुले तोडफोड गरेका छन् ।

विद्यार्थीहरुको समूहले कार्यालयमा रहेको सवारी साधन फुटाउनुका साथै उपकुलपतिको कार्यालय तोडफोड गरेका हुन् ।

त्रिविका सूचना अधिकारी सूर्य अधिकारीका अनुसार विद्यार्थीले कार्यालयको कुर्सी, झ्याल तथा ढोकाहरु फुटाएका हुन् ।

महानगरीय प्रहरी वृत्त कीर्तिपुरका डीएसपी रुकेश तण्डुकारले विद्यार्थीको ढुंगा प्रहारबाट कार्यालयका झ्यालका सीसा फुटेको र गाडीमा क्षति भएको बताए । उनले केही विद्यार्थीलाई नियन्त्रणमा लिएको पनि बताए ।

तोडफोड भएको केहीबेरपछि नेविसंघका विद्यार्थीहरुले उपकुलपतिको बास्कोटाको कुर्सीसमेत जलाएका थिए ।

नेविसंघ, प्रजातान्त्रिक प्राध्यापक संघ तथा लोकतान्धिक प्राध्यापक संघले यसअघि पनि विरोध गर्दै आएका थिए । बास्कोटासहित त्रिवि पदाधिकारीको कार्यशैलीप्रति उनीहरु असन्तुष्ट छन् ।

असन्तुष्ट समूहले केही समयअघि कार्यकक्षमा ताला लगाएको थियो । अदालतको आदेशपछि उक्त ताला खोलिएको थियो ।