रुकुम– रुकुम पश्चिमको चौरजहारी नगरपालिकाको सोती गाउँमा गत जेठ १० गते ६ जनाको ज्यान जाने गरी भएको घटनाको अनुसन्धान गर्न थप ३ जना स्थानीय पक्राउ परेका छन ।

घटनाको थप अनुसन्धान गर्न उनीहरुलाई पक्राउ गरिएको जिल्ला प्रहरी कार्यालय रुकुम पश्चिमका प्रमुख ठगबहादुर केसीले जानकारी दिए ।

पक्राउ पर्नेमा स्थानीय घमण्ड मल्ल, बिष्णु मल्ल र सबिन पुन छन । घमण्ड र विष्णु मृतक परिवारले कर्तब्य ज्यानको किटानी जाहेरी गरेका फरार ब्यक्ति हुन भने सबिन थप अनुसन्धानका लागि पक्राउ गरिएका हुन ।

योसँगै मृतक परिवारले २० जनालाई किटानी जाहेरी गरेकोमा उनीहरु सबै पक्राउ परिसकेका छन । किटानी जाहेरी गरिएकासँगै थप अनुसन्धान गर्न अन्य ८ जनालाई पक्राउ गरेसंगै उक्त घटनामा पक्राउ पर्नेको संख्या २८ पुगेको छ ।

यसअघि पक्राउ परेकालाई २० दिन हिरासतमा राखेर अनुसन्धान गर्न अनुमति दिएको छ । उक्त घटनाको अनुसन्धान प्रकृया अन्तिम चरणमा पुगेको प्रहरीको भनाई छ ।