चौतारा– १२ वैशाख २०७२ को बिनासकारी भूकम्पले सबैभन्दा बढी क्षति पुगेको सिन्धुपाल्चोक जिल्लामा घरबार बिहीन हुन पुगेका भूकम्पपीडितमध्ये ७६ हजार नौ सय ८० परिवारको आवास निर्माण सकिएको छ ।

निजी आवासतर्फ सिन्धुपाल्चोकमा हालसम्म कायम भएका पछिल्लो गुनासोसहित जम्मा लाभग्राही ९० हजार सात सय ५९ रहेका थिए । जसमध्ये ८७ हजार ७ सय ५८ लाभग्राहीले आवास निर्माणका सम्झौता गरेको जिल्ला आयोजना कार्यान्वयन इकाइ अनुदान व्यवस्थापन तथा स्थानीय पुर्वाधारका प्रमुख भरत आचार्यले बताए ।

अनुदान सम्झौता गरेर ८४ हजार चार लाभग्राहीले दोस्रो किस्ता वापतको रकम लिएको अनुदान व्यवस्थापन तथा स्थानीय पुर्वाधार कार्यालयसँग तंथ्याक छ । सिन्धुपाल्चोकमा रकम बुझेर घर निर्माण नगर्ने १६ जनाले पहिलो किस्ता बापतको ५० हजार रकम फिर्ता गरिसकेको प्रमुख आचार्यले बताए ।

सिन्धुपाल्चोकका एक सय ६८ पहिचान भएका भूमिहीन लाभग्राहीहरूमध्ये ३५ जनाले मात्र जग्गा खरिद गरि अनुदान प्राप्त गरेका छन् । जिल्लामा ७ सय १७ जना बिस्तापित भएका मध्ये तीन सय २१ जना लाभग्राहीले मालपोत कार्यालयबाट जारी भएको लिखतको आधारमा अधिकतम प्रति लाभग्राही २ लाखसम्म जग्गा खरिद बापतको थप अनुदान पाइसकेका छन भने तीन सय १९ जनाले आवास निर्माण गरिसकेका छन् । जस मध्ये हेलम्बु दुई चित्रेको दुई परिवारले जग्गा पुर्जामा भए जति नभएको भन्दै पुर्जा मुताविकको जग्गा माग गरिरहेका छन् ।

यस्तै २०७६ चैत्र मसान्तसम्म पहिचान भएका ९० हजार पाँच सय ७९ कुल लाभग्राही मध्ये ७६ हजार नौ सय ८० भूकम्प पीडितले नयाँ तेस्रो किस्ता बापतको रकम बुझेका जिल्ला आयोजना कार्यान्वयन इकाइ (भवन)का प्रमुख सन्तोष निरौला बताउँछन् ।

उनका अनुसार चैत्र मसान्त सम्म लाभग्राही मध्ये ८७ हजार छ सय ८७ लाभग्राहीले पहिलो किस्ताबापत ५० हजार र ८४ हजार चार लाभग्राहीले दोस्रो किस्ताबापत थप एक लाख ५० हजारको लागि सिफारिस भएको छ । जिल्लामा भूकम्पले निजी आवास गुमाएका सूचीकृत परिवारमध्ये ८८ प्रतिशतको आवास निर्माण सम्पन्न निरौलाले जानकारी दिए ।