काठमाडौं – कोरोना भाइरसको उपचारमा संलग्न हुनेलाई पर्सनल प्रोटेक्टिभ इक्विपमेन्ट (पीपीई)को आवश्यकताबारे बेलायती प्रधानमन्त्री बोरिस जोनसनलाई बोध गराउने चिकित्सकै कोरोना भाइरसले ज्यान लिएको छ ।

पूर्वीलण्डनको होमर्टन हस्पिटलमा कन्सल्टेन्ट युरोलोजिस्टको रुपमा कार्यरत ५२ बर्षीय डा. चौधरीको कोरोना भाइरसको संक्रमणपछि उपचारकै क्रममा बुधबार मृत्यु भएको हो ।

चौधरीले गत महिना एक फेसबुक पोस्टमार्फत प्रधानमन्त्री जोनसनलाई पीपीइको आवश्यकताबारे बोध गराएका थिए ।

उनले  नेशनल हेल्थ सर्भिस (एन्एचएस)का सबै स्वास्थ्यकर्मीलाई पीपीई उपलब्ध गराउन आग्रह समेत गरेका थिए । तर तिनै डाक्टर चौधरीको भने कोरोना भाइरसले ज्यान लिएको छ ।

मार्चको अन्त्यतिर बेलायतका ३ हजार ९६३ डाक्टरहरुले द सन्डे टाइम्मा खुला पत्र लेख्दै ‘आफूहरुले प्रत्येक दिन आफ्नो जीवन जोखिममा राखेर’ काम गरिरहेको बताएका थिए ।

उनीहरुले २०१५ मै एक्सपायर भइसकेका मास्क प्रयोग गरेर काम गर्नुपरेको भन्दै आइसीयू र एनेस्थेसियामा काम गर्ने डाक्टरहरु अझै ठूलो जोखिममा रहेको बताएपछि डा. चौधरीले प्रधानमन्त्री बोरिसलाई चिकित्सकको सुरक्षामा ध्यान दिन आग्रह गर्दै आएका थिए ।