काठमाडौं– खबरहबको प्रधानसम्पादकमा वरिष्ठ पत्रकार गोविन्द लुइँटेल नियुक्त भएका छन् ।

खबरहब व्यवस्थापनको बुधबार बसेको बैठकले लुइँटेललाई चैत १ गतेदेखि लागू हुनेगरी प्रधानसम्पादकमा नियुक्त गरेको हो ।

दरबारमार्गस्थित पेभेलियन हलमा आयोजित कार्यक्रममा खबरहबका अध्यक्ष नरेश श्रेष्ठले लुइँटेललाई प्रधानसम्पादक नियुक्त गरेको घोषणा गरे । खबरहब व्यवस्थापनले प्रधानसम्पादक जीवराम भण्डारीले दिएको राजीनामा स्वीकृत गर्दै लुइँटेललाई नियुक्त गरेको हो ।

वि. सं. २०५३ सालमा नयाँ विकल्प साप्ताहिकबाट पत्रकारिताको यात्रा शुरु गरेका लुइँटेलसँग विभिन्न पत्रपत्रिका र टेलिभिजनमा काम गरेको लामो अनुभव छ ।

खबरहबमा नियुक्त हुनुअघि उनी विगत १३ वर्षदेखि हिमालय टाइम्स राष्ट्रिय दैनिकमा सम्पादकको भूमिकामा थिए । लुइँटेल राजनीतिक, साहित्य लगायतका क्षेत्रमा कलम चलाउँदै आएका छन् । उनी पुस्तक लेखन तथा सम्पादनमा पनि सक्रिय छन् ।

निजी क्षेत्रबाट सञ्चालित नेपालको पहिलो टेलिभिजन ‘च्यानल नेपाल’मा पनि उनले पाँच वर्षभन्दा लामो समय सम्पादकको भूमिका निर्वाह गरेको अनुभव छ ।

खबरहब व्यवस्थापनले स्थापनाकालदेखि नै प्रधानसम्पादकको भूमिका निर्वाह गरेका वरिष्ठ पत्रकार भण्डारीलाई संस्थालाई यो उचाइसम्म ल्याउन महत्वपूर्ण योगदान दिएको भन्दै धन्यवाद दिएको छ ।

अध्यक्ष श्रेष्ठले व्यक्तिगत कारणले भण्डारीले राजीनामा दिए पनि उनी एक अनुभवी र व्यावसायिक पत्रकार रहेको उल्लेख गर्दै संस्थाले उनको योगदानको स्मरण गरिरहने बताए ।

श्रेष्ठले लुइँटेलको नेतृत्वमा खबरहब अझ उचाईमा पुग्ने विश्वास व्यक्त गरे ।