विराटनगर– आफ्नै बुवासँग अपहरण परेका नाटक गरी फिरौती रकम माग्ने छोरालाई प्रहरीले पक्राउ गरेको छ ।

पक्राउ पर्नेमा मोरङको बुढीगङ्गा गाउँपालिका–३ बाँसबारी घर भएका शिवनारायण महतोका २४ वर्ष छोरा मुकेशकुमार महतो छन् ।

प्रहरीका अनुसार मुकेशले फागुन २३ गते दिउँसो आफ्ना बुवा शिवनारायणलाई फोन गरेर आफू अपहरणमा परेको बताएका थिए ।

अपहरणकारीले ३० लाख रुपैयाँ फिरौती मागेको भन्दै उनले पैसा तिरेर आफूलाई छुटाउन भन्दै बुवा शिवनारायणलाई फोन गरेका थिए ।

शिवनारायणले त्यसको दोस्रो दिन (फागुन २४ गते) मात्रै आफ्नो छोरा अपहपरणमा परेको भन्दै प्रहरीमा खबर गरेका थिए ।

पछि फागुन २६ गते मुकेशले बुवा शिवनारायणलाई फोन गर्दै अपहरणकारीलाई २१ लाख रुपैयाँ तिरे पुग्ने भन्दै तत्काल पैसाको व्यवस्था गर्न भनेका थिए ।

शिवनारायणले पनि छोरा मुकशले भनेजस्तै १८ लाख रुपैयाँ नगद र ३ लाख रुपैयाँको चेकसहितको झोला विराटनगर महानगरपालिका–४ मा नहर नजिक झ्याङमा राखेका थिए ।

शिवनारायणको सूचनाका आधारमा पैसा राखिएको ठाउँमा पुगेको प्रहरीले बुढीगङ्गा गाउँपालिका–३ कै २५ वर्षीय कृष्ण राजवंशीलाई पक्राउ ग¥यो । शिवनारायणको घरमा मुन्सीको काम गर्ने कृष्णमाथि अनुसन्धान गर्ने क्रममा मुकेशले नै अपहरणमा परेको नाटक गरेको देखियो ।

प्रहरीले मुकेशलाई नै नियन्त्रणमा लिएर अनुसन्धान अगाडि बढाउँदा उनले आफ्नो बुवासँग पैसा माग्न लाज लागेपछि अपहरणमा परेको नाटक गरेको बताए ।

मुकेशले यसअघि एकजना मिटरब्याजीबाट ५ लाख रुपैयाँ ऋण लिँदा उनको परिवारले ९६ लाख रुपैयाँ तिर्नु परेको थियो ।

पछिल्लो समय पनि आफूले विभिन्न ठाउँबाट लिएको ऋण बढ्दै गएपछि पैसा माग्न नसकेर अपहरणमा परेको नाटक गर्नु परेको मुकेशले बयानमा बताएका छन् ।

अपहरणको नाटक गरेर आफ्ना बुवासँग फिरौतीको रुपमा लिएको १८ लाख नगदमध्ये उनले १ लाख ४७ हजार रुपैयाँ विभिन्न ठाउँमा गरी खर्च गरेको भेटिएको छ । बाँकी १६ लाख ५३ हजार र ३ लाख रुपैयाँ बराबरको चेक बरामद भएको प्रहरीले जानकारी दिएको छ ।