काठमाडौं- अमेरिकाले चीनका चार सैनिक अधिकारीमाथि साइबर आक्रमणमा संलग्न भएको आरोपमा अभियोग दर्ता गरेको छ ।

क्रेडिट रेटिङ जाइन्ट एक्वीफ्याक्समा भएको ठूलो साइबर आक्रमणमा संलग्न भएको आरोप ती चिनियाँ सैनिक अधिकारीमाथि छ ।

सन् २०१७ मा भएको सो साइबर आक्रमणका कारण १४७ मिलियन भन्दा बढी अमेरिकी प्रभावित भएका थिए ।

ह्याकरले उनीहरुको नाम, ठेगानासहितका व्यक्तिगत जानकारी चोरी गरेका थिए । बेलायत र क्यानडाका केही मानिस पनि प्रभावित भएका थिए ।

चीनका सैनिक अधिकारीमाथि अभियोग दर्ता गरेको घोषणा गर्दै अमेरिकाका महान्यायाधीवक्ता विलियम बारले सन् २०१७ मा भएको सो साइबर आक्रमण ‘इतिहासकै सबैभन्दा ठूलो आक्रमण’ रहेको उल्लेख गरे ।

अदालतमा दर्ता गरिएका कागजात अनुसार आरोपित चारैजना चीनको पिपुल्स लिबरेसन आर्मीको ५४ औँ अनुसन्धान इन्स्टिच्युडका सदस्य हुन् । सो इन्स्टिच्युड चिनियाँ आर्मी मातहतकै संस्था हो ।

चिनियाँ सैनिक अधिकारीले हप्तौँसम्म कम्पनीको प्रणालीमा निगरानी गरेर त्यसको सुरक्षा प्रणाली तोडी व्यक्तिगत जानकारी चोरी गरेको उल्लेख गरिएको छ ।