प्रायः महिलाहरु महिनावारीका बारे कुरा गर्न लजाउँछन् । नेपाली महिलामाझ अझै पनि महिनावारी बारे धेरै भ्रम छ ।

महिनावारी वा रजश्वला एउटा शारीरिक प्राकृतिक प्रक्रिया हो । यसप्रति कुनै पनि अन्धविश्वासको भर पर्नु हुदैन । त्यसैले हरेक महिलाले महिनावारीबारे वैज्ञानिक जानकारी लिन आवश्यक छ ।

महिनावारीको चक्र हरेक महिलामा फरक फरक हुनसक्छ । सामान्यता यो २८ दिनको चक्र हुन्छ । तथापी २२ देखि लिएर ३३ दिनसम्म महिनावारी चक्र सामान्य मानिन्छ । महिनावारी ढिलो हुदाँ गर्भवती हुने डर हुन्छ । तर कतिपय अवस्थामा स्वास्थ्य समस्याका कारण पनि यो चक्र ढिलो हुने गर्दछ ।

महिनावारीको समयमा शरीरबाट रक्तश्राव हुदाँ डराउँनु पर्दैन । यो शरीरको रगत कम भएको होइन । महिनावारीको समय एक दिनमा करिब चार चम्चासम्म रक्तश्राव हुन्छ । यो सामान्य हो । तर यो भन्दा बढि भएमा एक पटक चिकित्सकको परामर्श लिनु राम्रो हुन्छ ।

महिनावारीका विषयमा सदिऔंदेखि चल्दै आएको भ्रम हो नुहाउने वा कपाल धुनु हुदैन । तर यो केवल एक भ्रम हो । बरु यस्तो बेलामा स्वच्छतामा ध्यान दिनुपर्छ ।

महिनावारी हुदाँ महिलाले घरको वा कार्यालयको काममा जानु हुदैन भन्ने गलत धारणा हो । असामान्य अवस्था नभए महिनावारीको समयमा मज्जाले घरको काम वा कार्यालय जादाँ हुन्छ ।

महिनावारीको समय अमिलो, तेल तथा मसालायुक्त खाना खानुहुँदैन भन्ने गलत धारणा हो । महिनावारी र अमिलो पदार्थबीच कुनै सम्बन्ध हुदैन । बरु मसालायुक्त खानाले पेट खराब गर्न सक्छ । तर यसबाट महिनावारीको पीडामा असर भने पर्दैन ।

महिनावारीको समयमा व्यायाम गर्न हुदैन भन्नु भ्रम हो । यसले उल्टै पीडा कम गर्न मद्दत गर्छ । व्यायामले मांसपेशीमा अक्सिजनको आपूर्ति बढाउँछ, जसबाट शरीरमा आराम मिल्छ । त्यसैले महिनावारीको समयमा आराम गरेर मात्र नबस्दा हुन्छ ।

महिनावारीको समयमा यौन सम्पर्क हुदाँ गर्भधारण हुँदैन भन्ने गलत धारणा हो । महिनावारीको समयमा पनि महिला गर्भवती हुन सक्छन् । महिनावारीको चक्र २८ दिनभन्दा कम भएका महिला महिनावारीको समयमा गर्भवती हुने सम्भावना अधिक हुन्छ । तर अधिकाशं अवस्थामा महिनावारी हुदाँ गर्भ रहने संभावना कम हुन्छ । हुदैन भन्ने चाहि होइन ।

महिनावारीका बेला यौन सम्पर्क राख्नु हुदैन भन्ने हुदैन । यसबेला शरीरमा रक्तश्राव हुने भएकाले असहज वा दिङ्गदिङ्ग लाग्ने गर्दछ । तथापी केही चिकित्सक महिनावारीको समयमा यौन सम्पर्क गर्दा ज्यान दुखेको निको हुने बताउछन् । यो बेला सेक्स गर्दा पीडामा कमी आउँने उनीहरुको तर्क छ ।