काठमाडौं- पाकिस्तान नियन्त्रित कश्मिरमा प्राचीन बौद्ध कलाकृति, शिलालेख र ऐतिहासिक-सांस्कृतिक धरोहरहरु नष्ट गर्ने गरी दियामर-भाशा डैम बाँधको निर्माण हुन लागेकोमा नेपाल रिपब्लिक पार्टीले आपत्ति जनाएको छ ।

‘गिलगित-बल्तिस्तान क्षेत्रमा निर्माण हुने उक्त बाँधले सात हजार वर्ष अघिका पाँच हजार भन्दा बढी पुरातात्विक महत्वका शिलालेख र कलाकृतिहरू मात्र होइन, सांस्कृतिक-पुरातात्विक वैभवले सम्पन्न एउटा सिङ्गो गाउँ नै डुब्नेछ’ प्रेस विज्ञिप्तमा भनिएको छ ।

सो क्षेत्र विशेषतः प्राचीन बौद्ध धरोहर भए पनि उक्त सम्पदाले बौद्ध-हिन्दू धर्म-संस्कृतिका साथै मानवीय इतिहास र संस्कृतिकै संरक्षणका दृष्टिले महत्वपूर्ण रहेको छ ।

यस्तो अवस्थामा बौद्ध-हिन्दू धर्म-संस्कृतिको विरोधी पाकिस्तान र कम्युनिष्ट चीनको साठगाँठमा उक्त बाँधको निर्माण गरिनु आपत्तिजनक भएको विज्ञप्तिमा उल्लेख छ ।

नेपाल रिपब्लिक पार्टीले उक्त ठाउँमा उक्त बाँध निर्माण कार्य तत्काल रोक्न पाकिस्तान र चीन सरकार दुवैलाई आग्रह गरेको छ । बाँध निर्माण आवश्यक नै भएमा उक्त स्थान भन्दा तल वा माथि निर्माण गरिनुपर्ने जनाएको छ ।

ऐतिहासिक सम्पदालाई क्षतिग्रत र नष्ट नबनाउन उसले आग्रह गरेको छ।

रिपब्लिक पार्टीले यसबारे नेपाल सरकार, नेपालका बौद्ध-हिन्दू समुदाय र समग्र प्रजातान्त्रिक विश्वको ध्यानाकर्षण गराएको छ ।

धर्म, संस्कृति र मानवीय इतिहासप्रति आस्था राख्ने प्रत्येक देशका र प्रत्येक समुदायले उक्त स्थानमा सो बाँध निर्माणप्रति आपत्ति जनाएको विज्ञप्तिमा उल्लेख छ ।

चीनको उक्साहटमा पाकिस्तानले उक्त विवादित स्थानमै बाँध निर्माण गर्यो भने यसको गम्भीर परिणाम उसले भोग्नुपर्ने समेत नेपाल रिपब्लिक पार्टीले चेतावनी दिएका छ।