काठमाडौं – कमेडी विधामा फिल्म ‘हुतुतु’ बन्ने भएको छ । निर्माता सन्तोष सेनले लगानी गर्ने यो फिल्ममा लोकप्रिय कलाकारहरुको अभिनय रहने तय भएको छ ।

सन्तोष सेनले दिएको जानकारी अनुसार फिल्ममा वरिष्ठ कलाकार हरिवंश आचार्यदेखि प्रदीप खड्कासम्मको अभिनय रहनेछ । उनका अनुसार फिल्ममा हरिवंश र प्रदीपसँगै पल शाह, राजाराम पौडेल, गौरव पहारी, माओत्से गुरुङ, नाजिर हुसेन, सलोन बस्नेत लगायतका कलाकारको अभिनय रहनेछ ।

ठूलो लगानीमा निर्माण हुने बताइएको यो फिल्मको अहिले स्क्रिप्टमा काम भइरहेको छ । साथै फिल्ममा महिला कलाकार को रहने भन्ने अझै तय भइसकेको छैन ।

निर्माताका अनुसार फिल्मको छायांकन केही समयपछि थालिनेछ ।

यो फिल्ममा प्रदीप खड्का र पल शाहलाई एकसाथ देख्न पाइनेछ । पल, प्रदीप र हरिवंश एउटै फिल्ममा भएका कारण पनि फिल्मलाई दर्शकले चासोका साथ लिएका छन् ।

निर्माता सेनले निर्माण गरेको फिल्म ‘प्रेम गीत ३’ भने कोरोना भाइरस महामारीका कारण रिलिज हुन सकेको छैन । उक्त फिल्म रिलिजको पर्खाइमा छ ।

फिल्म रिलिज नहुँदै निर्माता सेनले अर्को फिल्मको घोषणा गरेका हुन् ।