काठमाडौं- पछिल्लो २४ घण्टामा नेपालमा सबैभन्दा बढी पानी पोखरामा परेको छ।

“सबैभन्दा बढी वर्षा कास्की जिल्लाको पोखरा विमानस्थल केन्द्रमा मापन गरिएको छ,” राष्ट्रिय विपद् जोखिम न्यूनीकरण तथा व्यवस्थापन प्राधिकरणले आज जारी गरेको विज्ञप्तिमा उल्लेख छ।

मानव सञ्चालित ३७ र स्वचालित १७७ मापन केन्द्रहरूमा वर्षाको मापन गरिएको थियो।

केन्द्रहरूमध्ये १८६ वटा केन्द्रहरुमा वर्षा भएको थियो। ती केन्द्रहरूमध्ये पोखरामा सबैभन्दा बढी वर्षा भएको थियो।

प्राधिकरणका अनुसार वर्षा मापन केन्द्रहरू मध्ये एउटामा २५० मिलिमिटर भन्दा बढी, दुईवटा केन्द्रमा २०० मिलिमिटरभन्दा बढी, तीनवटा केन्द्रमा १५० मिलिमिटर भन्दा बढी, १६ वटा केन्द्रमा १०० मिलिमिटर भन्दा बढी, ५९ केन्द्रमा ५० मिलिमिटरभन्दा बढी, १०६ वटा केन्द्रमा २५ मिलिमिटरभन्दा बढी र १४८ केन्द्रहरूमा १० मिलिमिटरभन्दा बढी वर्षा मापन गरिएको थियो।

पछिल्लो २४ घण्टामा कास्की, तनहुँ, लम्जुङ, पर्वत र म्याग्दीमा सबैभन्दा बढी पानी परेको थियो। भारी वर्षापछि गएको पहिरो कारण पोखरामा मात्र आज १० जनाको मृत्यु भएको थियो।

बिहीबार बिहान १० बजे देखि शुक्रबार बिहान १० बजेसम्म पोखरामा २५०.९ मिलिमिटर पानी परेको थियो।